Skáladalur
Efnisyfirlit
Ábúendur
Sigurður Guðmundsson
Sigurður Guðmundsson. Fæddur um 1654.
Hann bjó ókvæntur og barnlaus í Skáladal 1703. Meira er ekki um hann vitað.
Ólafur Björnsson
Jón Bjarnason
Jón Bjarnason. F. um 1692, var á lífi 1753.
Hann mun hafa verið sonur Bjarna Jónssonar á Látrum og konu hans Guðrúnar Guðlaugsdóttur. Hann bjó í Skáladal 1735, en var bóndi í Hælavík 1753.
Í þjóðsögum er sagt, að Snorri Björnsson, prestur á Stað í Aðalvík og síðar á Húsafelli, hafi átt í galdrasviptingum við Jón, gamlan bónda í Hælavík. Ef til vill hefur það verið þessi Jón.
Einar Þorláksson
Einar Þorláksson. Fæddur um 1699. Var á lífi 1762.
Foreldrar: Þorlákur Bárðarson bóndi á Kaldrananesi í Bjarnarfirði á Ströndum og kona hans Guðrún Einarsdóttir
Ekki verður með vissu sagt hver börn Einars hafa verið, en líklega má telja að meðal þeirra hafi verið: Ólafur Einarsson bóndi á Látrum, Einar Einarsson bóndi á Læk og ef til vill Halldóra Einarsdóttir, sem bjó ekkja á Horni 1787.
Einar var ekki kominn í Skáladal 1744, en var farinn að búa þar 1753 og bjó þar fram yfir 1762. Líklega hefur Ólafur Einarsson búið nokkur ár í Skáladal, áður en hann fluttist að Látrum.
